تعليقات صيفية من تونس
توة عندي حوالي الأسبوع ملي جيت لتونس و حسيت في البداية بفقدان كامل لأي رغبة في التدوين.... كاينو التدوين المدة لخرة خاصة ملي بديت مدونة أفكار ليلية كان مجرد همزة وصل مع تونس قبل ما نرجع و كي رجعت كاينو ماعادش فما ضرورة بش نكمل ندون... لكن بالطبيعة لحكاية ظهرت دودة و خوكم رجعتلو النفحة...
السخانة و الغبرة و العجة ميكست
باهي ليامات لولة ملي رجعت كانت بالطبيعة لقاءات مكثفة مع صحابي و العايلة بش نتدارك إلي فاتني.... بخلاف هذاكة أول ملاحظة هي السخانة الهم الجمعة إلي فاتت... أما بون بما أني نسهر إمخر و نقوم إمخر ما فماش علاش بش نحس بحاجة كبيرة خاصة إلي ما نخرجش مل الكليماتيزور في الدار و الكرهبة و القهوة... على خاطر أنا نحمل كل شي إلا السخانة الله غالب مانجمش.... إلي ينجم يخلي السخانة جحيم هي الغبرة... الغبرة... أب أب أب... ملا هم... الغبرة تتحير في الصيف... ديما فما غبرة خاصة مع الكماين الكبار و الشانتيات متاع الكياسات خاصة في رادس الغبرة ما توفاش.... أما الحقيقة بالنسبة للشانتيات فما الكياسات الجدد إلي حضرو (خاصة القصة من رادس لتونس ورا سيدي رزيق و مقرين) و إلا إلي يحضرو فيهم (خاصة الجسر بين رادس و حلق الوادي) يلزم الواحد يقول الرسمي حاجة باهية.... باهي توة نجي للمستجدات من نوع آخر و إلي فاتتني و أنا البرة... أولا التمخميخ... فقت إلي بعد مرحلة الملاوي و الشاباطي فمة غرمة جديدة في مطاعم "الأكلة الخفيفة" (يحب يقول اللبلابي و الهرقمة) بالعجة ميكست (مخلطة) بالمرقاز و الكروفات... بالطبيعة هذية زادة أكلة خفيفة... و أنا نموت على الأكلة الخفيفة متاع تونس... ما كيفها حتى أكلة خفيفة.... ثانيا... "حي النصر"... إلي مشيتولو توة عامين إلتالي وقتلي غرق في الفياضانات... و قالولي "لا يا راجل ولى حاجة خارقة للعادة"... آخي مشيت نطل لقيت.... الغبرة الغبرة أب أب أب... الغبرة ماتوفاش في حي النصر و زيد معاها برشة صفاقسية (مع احترامي لاخواني المدونين الصفاقسية أما راني ما نجمش نحمل الغبرة مع السخانة مع الصفاقسية في بقعة وحدة) باهي صحيح فمة شوية قهاوي و رستورونات ألا أمريكان (هافانا، و إلخ)... أما الحقيقة كالعادة ماخيبوليش ظني السرفيس حموم و الماكلة متوسطة... و نخير الرستورونات المسخين متاع وسط البلاد متاع الأكلة الخفيفة (خاصة صاحبي ولد حنيفة) عليهم بألف مرة..... مازال بالطبيعة عندي ملاحظات أخرى خاصة على جيان العظيم و المتسوقين في كارفور... أتوة نجيها إل مرة إجاي
الجمهورية و الملكية الدستورية
توة بعد ما وفينا من الاحتفالات بالخمسينية و اليوبيل الفضي ربما جا الوقت بش نتساؤلو بعض الأسئلة غير الودية... أول سؤال هو أكثر سؤال بديهية: هل كان في النهاية من الضروري أنو قادة دولة الاستقلال يقررو الإعلان على جمهورية.... توة أصبح من الواضح كيفما مثلا قالو بعض المؤرخين في عدد الصباح متاع البارح إلي الجمهورية فشلت أن تتحقق بحضور الرئيس الراحل بورقيبة إلي أصر من البداية و في تفاصيل الدستور و في التنقيحات اللاحقة و الأهم من هذا الكل في ممارساتو أنو يحول النظام الرئاسي الجمهوري إلي نظام شبه ملكي.... و في الحقيقة نطرح التساؤل هذاية في وقت إلي تشوه فيه من قبل بعض المنتمين للعائلة الحسينية و إلي مازالو يعتبرو البلاد ملكهم و تسرقت منهم و ماذابيهم كان نرجعو لعهد البايات و الراطسة هذية مازالت موجودة عنا بما فيها من "طبقة النبلاء" البلدية إلي يعتقدو رواحهم من عرق أرقى.... نطرح التساؤل هذا، إذا، من زاوية أخرى تماما: نطرحها من زاوية هل كان الإعلان على الجمهورية عقبة أمام التحول الديمقراطي في تونس؟ نطرح التساؤل هذا على خاطر بورقيبة رسخ في نهاية الأمر تركيبة بنيوية مش من الساهل بش تتنحى مفادها أن مؤسسة الرئاسة مرتبطة عضويا بمؤسسة الحزب الحاكم و بالتالي التداول يلزم يتم عليهم لثنين و هذاية ماكانش ممكن... في مقابل هذا في أمثلة أخرى تقربلنا من الناحية الجغرافية و الثقافية كيفما المغرب و الأردن كانت استقلالية مؤسسة الملكية عن بقية النظام السياسي مهمة برشة في تسهيل الانتقال سلميا نحو حد أدنى من التداول السلمي على الأقل في المؤسسة البرلمانية... في المغرب وصل الأمر لترؤس الحكومة من قبل إتحاد القوى الاشتراكية إلي أسسو المهدي بن بركة و كان في بداية دولة الاستقلال بمثابة الحزب الحاكم قبل مطاردتو من الملك و العركة بينات الحسن الثاني و المهدي بن بركة.... و برغم هذاكة و لأنو الملك ماعمرو مارتبط عضويا و رسميا بأي حزب كان ساهل بش يعاود يقحم حزب اتحاد القوى الاشتراكية في السلطة قبل ما يتوفى... و توة هاو حزب كيف حزب العدالة و التنمية المغربي إلي يشبه برشة لنظيرو التركي يحضر في روحو بش يستلم السلطة كيفما كل استطلاعات الرأي قاعدة تقول... صحيح إلي الملك مازال يحتفظ بحق تعيين "وزراء السيادة" خاصة الخارجية و الداخلية و الدفاع و لكن هذيكة هية ميزات أي مرحلة انتقالية نحو الديمقراطية... بالطبيعة مقابل هذاية فما سؤال آخر بديهي زادة و إلي هوة أنو قادة الحركة الوطنية ماكانو قادرين بش ينحيو الملكية إلا لأنو الملكية هي ضعيفة أصلا و أمورها تاعبة خاصة بعدما تآمرت العايلة الحسينية مع الفرنسيس على الباي الوحيد إلي كان ينجم يضمن تأسيس ملكية دستورية قوية في دولة مستقلة يعني المنصف باي... يعني في النهاية إعلان الجمهورية ماكان ممكن إلا لأنو الملكية الدستورية ماعادش ممكنة... و هذاية يأدي بينا لأنو نلغيو التساؤل لول ("هل كان من الضروري إعلان الجمهورية") لأنو بكل بساطة هذيكة التركيبة السياسية متاع وقتها شنوة كانت تنجم تأدي.... خاصة مع ظروف مساعدة كيفما ضعف القيادات الحزبية غير الموالية تاريخيا لبروقيبة مع انشقاق صالح بن يوسف و موت الهادي شاكر... لكن هذا ما يلغيش الملاحظة الثانية (هل كانت "الجمهورية" عقبة أمام الديمقراطية؟") لأني نعتقد أنها في النهاية ما تبعدش برشة على الخزمة
حول مجتمع المدونين
فمة زوز ملاحظات مختصرة. أولها ترحيبي بالمبادرة متاع حاكم النورمال لاند بِإنشاؤو لمدونة بودورو إلي أصبحت نكتب فيها بدوري.... ثانيا عندي ملاحظة حول تذمر الصديق آدم من الكلام الزايد متاع واحد من المدونين... و في الحقيقة نحب نقول لهنا إلي آدم عندو كل الحق في أنو يرفض أنو يمسخولو المدونة متاعو بحاجات هو يرفضها نقول لكلام هذا خاصة بعد إلي عرفت إلي المدون المغروم بالكلام الزايد (و هذاية بالمناسبة حقو) يعاني من بعض المشاكل مع ذاتو و بلغة أخرى خواف "فوق العادة" حسب ما فهمت... خاصة أن السيد وقتلي تعرضت المدونة متاعو للحجب يظهر حتى طلب "عدم التضامن" معاه و هذية أول مرة نسمع بيها بحاجة كيفما هكة... و هذاكة علاش إذا كانو ناقم على روحو يلزم يحل المشكلة في مدونتو مش في مدونات ناس أخرين و هذاية ما ينقصش في حرية التعبير متاعو مادامو يلعب قدام دارهم
ملاحظة أخيرة
أهم حدث الصيف هذاية من الناحية الشخصية هو طهور ولدي الصغرون إلي عمرو عشرة أشهر أكهو... بعض الناس لاموني علاش ما طهرتوش ملي تولد و رتحتو... خاصة إلي الطهور في أمريكا ولى تقريبا بشكل آلي مع الولادة.... لكن في الحقيقة ما حبيتش نحرمو نهار آخر من تصاور الطهور إلي نعرف أنهم من أهم التصاور في الألبومات متاعنا... زيد في العمر هذاية ما يتقلقش و فيسع ما يبرى... وهذاكة إلي حصل في النهاية
أيا العاقبة لأبنائكم أجمعين
