راديو "تيت"... إكتشاف رائع... نموذج لرديون المستقبل

توة مدة قاعدين نحاولو نطورو في موقع رديون.. طبعا تجربتنا مازالت جديدة و قاعدين نتعلمو... هذاكة علاش قاعدين نحاولو نشوفو تجارب أخرى... الصديق عمروش و هو يشارك معانا في موقع رديون بعثلي الرابط متاع الموقع هذاية... راديو "تيت"... إلي هو موقع مصري.. حقيقة ملي بديت نسمع في التسجيلات لولة حسيت أنو هذا بالضبط الشي إلي ناقصنا في رديون... يعني هوما ماعندهمش حوارات كيف إلي عملناها.. و أنا نعتقد إلي الحورات إلي عملناها نقطة إيجابية برشة و بالتأكيد يلزم نواصلوها على خاطر ببساطة فمة حاجة واضحة عندنا للحوار... أما فمة حاجة ناقصة كنت نفكر فيها المدة الفايتة و اقترحتها على بعض أعضاء رديون و إلي هي أنو كل واحد منا يعمل فقرة صغيرة خاصة بيه يحكي فيها بالشاكلة إلي يحسها "أوريجينال"... حقيقة كي نسمع لولاد متاع راديو "تيت" نحس برغبة في التعلم منهم... باهي كي ناخذو مواضيع جدية نتحدثو فيها لكن باهي زادة كي نعملو حاجات ماهياش كلاسيكية... باهي كي نتحدثو على الأمور الجدية بسخرية... على كل انشالله نطورو موقع رديون في الاتجاه هذا عن قريب

بالإضافة للحورات الحصرية متاع "مبعوث" متاعهم لغانا بش يعمل حوارات مع منخب الكورة متاع مصر... نحب نقترح عليكم فقرات معينة كأمثلة على إلي نحكي عليه

نشرة الأخبار

تعليق على تاريخ الشرطة في مصر

تعلم النضال في خمسة أيام

و "الأعدة السرية"..

في لخر نحب نقول للمدونين و إلا غير المدونين إلي يحبو يساهمو في رديون بأشياء من النوع هذا مرحبا بيهم... بالإضافة من خلال رديون نبثو في إذاعة تونس زوون... نعرف إلي نحنا التوانسة ما ناقصنا شي.. بالعكس كي نشوف الكتابات إلي تتحدث بسخرية على أمور جدية من قبل مدونين و كتاب توانسة نقول شنوة المانع أنو هذا يصير بشكل مسموع