بالرغم من "إنتصارات" هيلاري... أوباما مازال رابح

طبعا الانتخابات التمهيدية الأمريكية كيما هو معروف توة لمختلف شعوب العالم ما تتحسمش بعدد الأصوات بل بالاقتسام النسبي للمندوبين... و بالرغم من "إنتصار" هيلاري في ثلاثة ولايات البارح فإنو أوباما مازال متفوق عليها في عدد المندوبين (الأرقام إلي تقعد غير دقيقة من موقع سي أن أن هنا)... حتاش لتوة عندو 1520 مندوب مقابل 1424 مندوب لهيلاري (بما في ذلك نتائج التكساس إلي تقسمت بشكل نسبي حتاش لتوة لأنو مازال الحساب جاري 77 مندوب لهيلاري و 71 لأوباما... كيف كيف أهايو هيلاري 73 و أوباما 63)... يعني السباق مازال حامي و هيلاري منعت من الخروج توة... خاصة بعد الحملة القوية اليائسة متاع "الضرب تحت الحزام "ضد أوباما إلي حبت تظهرو "مسلم" (كاينها تهمة... شوف اللقطة هذية إلي تعدات في برنامج 60 دقيقة نهار الأحد قداش معبرة بالنسبة لمواطن أمريكي عادي من ولاية وسط أمريكا كيف ولاية أوهايو) و "ضعيف في الامن القومي "و عندو "ازدواجية في الخطاب و القيم".... حملة واضح إلي كانت منسقة (شارك فيها طاقم حملة هيلاري) و ماهي إلا بروفة على الحملات إلي بش يتعرضلها أوباما عن قريب... المحطة الجاية بحذانا في بنسلفانيا...