الخميس، جانفي 17، 2008

برنامج إذاعي جديد "تولك شوو" على إذاعة تونس زوون... و موضوع إذاعات الانترنت و مدونة الرديون



Tuniszone plus que la aradio
Plus que la radio !


الحقيقة نحب نقول إلي مدونة الرديون قاعدة تتوسع بشكل سريع فرحنا برشة... عدد متزايد من المدونين قاعدين يساهمو فيها... المرة لخرة بعد الحوار على موضوع مسابقة المدونات دخلنا في نقاش موضوع إذاعات الانترنت: السبب إلي خلانا ناقشو الموضوع هو أنو يسرا عرفتنا على المشرف على إذاعة "تونس زوون"... خونا مجدي إلي يقوم بعمل تطوعي هايل برشة حلينا معاه موضوع إذاعات الانترنت و كان حاضر معانا زادة راديو نجوي إلي كان ينشط في إذاعة محلية في "إي هاش أو سي"... كان حوار هايل برشة (رابط الحوار على الرديون)... الحاصل مجدي عبر على اهتمامو بحوارات الرديون و اتفقنا أنها بش تولي تتعدى مسجلة على إذاعة "تونس زوون" إضافة إلى أنو الحلقات السابقة قاعدة تتعدى... أكثر من هكة مجدي قاعد يطور في الإذاعة متاعو و حب يضيف برامج جديدة تتعدى على المباشر... يلزم لهنا نذكر إلي هو منفتح بشكل خاص على المدونين و الحصة الوحيدة توة إلي موجودة "يسرا زوون" تنشط فيها يسرا حول موضوع المدونات... المهم مجدي اقترح علي أنا و زيزو بش نعملو برنامج... قررنا بش نسميوه "تولك شوو" و من المفروض يتعدى أول مرة على المباشر نهار السبت هذا (9 متاع الليل وقت تونس).... طبعا البرنامج بش يتسجل زادة و يتحط كالعادة على مدونة الرديون... التعاون هذا بين التدوين و إذاعات الانترنت يظهرلي حاجة هايلة برشة توري إلي فمة أفكار أخرى حول العمل الإذاعي إلي تنجم تحدد مستقبل كيفية تقديم العمل الإذاعي...

فقط كليمة على برنامج "تولك شوو"... المرة هذية بش نحلو نقاش حول موضوع: المنتخب الوطني و المشاركة في كأس إفريقيا لكن أيضا موضوع الإعلامي الرياضي إلي قاعد يثير في عدد من التساؤلات كيف ما تمت الإشارة ليه في مدونة بودورو (هنا).... بش يشارك معانا في البرنامج بعض المدونين أو المشتغلين على الانترنت إلي مهتمين بالموضوع الكروي و لكن أيضا مدونين مش مغرومين بالضرورة بالكرة... من المفروض بش نعلنو على موضوع "تولك شوو" منو هكة على الفوروم متاع تونس زوون

3 التعليقات:

Sami Ben Gharbia يقول...

و الله انحب نشكر برشة الإخوة المشرفين على مبادرة رديون اللي تمثل إضافة لفضاء التدوين و الإعلام البديل التونسي. إلى جانب مدونة بودورو أنا أعتقد أن ها التجربتين من أحلى ما شفنا على الشبكة التونسية خلال السنة اللي تعدات

أرجو أن يقوم الإخوة بتاع رايدون بإضافة البودكاست متاعهم على برنامج الآيتيونز iTunes حتى تعم الفائدة و تمكن متابعة البرنامج و الإنخراط في تلقيمات المدونة

http://www.videojug.com/film/how-to-submit-a-podcast-to-itunes

Tarek طارق يقول...

شكرا سامي... أتوة نقوموا بإضافتو انشالله في أقرب وقت

radio Njoy يقول...

inchallah rabbi ywassil bissélim et nkounou à la hauteur