الأربعاء، ماي 21، 2008

حفل التخرج

بعد جمعتين عديتهم نجري من بلاصة لبلاصة في تونس و انقطاع عن التدوين رجعت لفيلادلفيا للمشاركة في حفل التخرج.... في الجامعات الأنقلوسكسونية حفل التخرج حاجة مهمة برشة عندو طقوسو و أجواؤو الخاصة... و بصراحة نتمنى أنو التقاليد هذية تنتقل لجامعات العالم الكل (و كل واحد طبعا ينجم يعطيها الصبغة المحلية متاعو) لأنها تحتفل بمجرد التخرج و تعطي قيمة معنوية كبيرة للشهادة.... هذية مسألة تولي مهمة خاصة في أماكن بدات الشهادة الجامعية تفقد في قدرها و قيمتها... على كل بالنسبة لتقاليد حفل التخرج فإنها مش مجرد لبسة أكهو بل طقوس تقتضي المشي بشكل جماعي و المشاركة في حفل جماعي بحضور هيئة التدريس متاع الكلية متاعك (مثلا كلية الفنون و العلوم و إلا الطب...) و عائلات الطلبة و يتم فيه تسليم الشهادة بشكل شخصي... الحفل هذا يسبقو حفل جماعي متاع كليات الجامعة الكل تصير فيها مسيرات جماعية منظمة لمكان الاجتماع و كلمات لشخصيات و عادة يتم استضافة متحدث مشهور لاستخلاص العبر من تجبرتو في الجياة العملية... المرة هذية في جامعتنا استضافو مايكل بلومبرغ (عمدة نيويورك و صاحب مجموعة بلومبرغ الإعلامية) إلي عمل برشة نكت و قال إلي بيه الفايدة في نصف ساعة (خاصة موضوع تسهيل هجرة الأدمغة و الصراع حول موضوع ملكية السلاح و اللوبيات في واشنطن... كلام كان فيه دعم مبطن لأوباما) و لو أنو بلومبرغ يظهرلي شخص ياسر انتهازي على المستوى السياسي (متقلب حسب الوضع من جمهوري لديمقراطي لمستقل) بالرغم هذا ما ينقصش من نجاحاتو و نزعتو التجديدية على مستوى مسيرتو الاقتصادية (يمكن مشاهدة الكلمة متاعو هنا)... على كل كان حفل التخرج نهار مليان باللقاءات و كان أحسن توديع لمقعد "الطالب" الرسمي نحو مقعد جديد يقعد في النهاية مقعد طالب العلم... خاصة أني شخصيا بش نقعد ضمن الأجواء الجامعية (لكن من موقع المدرس المرة هذية) و مش بعيد جغرافيا على الجامعة إلي قريت فيها

10 التعليقات:

3amrouch يقول...

الف مبروك دكتور

Bechir يقول...

أيا إينشالله مبروك والعاقبة لولدك :-)

حتى انا كنت في تونس الثلاثة جمعات الفايتة و complètement déconnecté زادة. تي هاي لاحمة البلوغسفير هالأيامات...

om youssef يقول...

saha saha l bou fadfoud.mala wahra ya docteur....

Bel Malwene يقول...

نشالله مبروك يا د. طارق ... وتاك الشابو هههههههههههههههه

Tarek طارق يقول...

عمروش.. شكرا يا سيدي.. أما انبه عليك هذية آخر مرة تعيطلي دكتور... أية ولد حومتي العاقبة ليك و لأبنائك

بشير... العاقبة ليك يا راجل إنت عادة قريب ياسر... خسارةما تلاقيناش في تونس... "لاحمة" باللحم... الكيو علوش حليب 9000... شي يأسف

أم يوسف... العاقبة ليوسف الفزغول... أما على شرط يرقد بكري
:)

مروان... فقت بية... أنا شادد روحي بالسيف بش مانحيتهاش

Carpe Diem يقول...

Mabrouk

info يقول...

aya mabrouk fadfoud...

Search for models new york

Slim يقول...

5latt imma5er mabrook ya tare9 inshallah min 7asan il a7cen!
:)
wmabrook zada lil club

Werewolf يقول...

مبروك يا طارق المرة هاذي أوفيسيالمون... أما ملاّ مايكل بلومبرغ و ملاّ تقتوقة
:)

ابوناظم المرزوقي يقول...

مبروك لخويا طارق
اما باهية الطربوش المربع يعمل وهرة
اما بالك تبدا من الجماعة اللي لوحوا طربوشهم الشرقي ونحوا العمامة ؟؟؟