البني في تونس: حول صور "البحيرة الجنوبية" أو العاصمة تونس الجديدة

كنت سبقلي أني تحدثت على موضوع البني في تونس و تحديدا حول المشروع إلي تشرف عليه شركة سما دبي (دبي القابضة) في تدوينة صوتية في الأسبوع إلي فات... و أكدت على إيجابية المشروع هذاية من الناحية الحضرية و المعمارية العامة بناء على جملة من المعطيات إلي أتوة نرجعلها في وقت لاحق... و كان الأخ فري رايس تفاعل مع التدوينة متاعي و ساهم برأيو في الموضع بشكل يثري النقاش.... يلزم نقول إلي الاهتمام متاعي هذا ناتج زادة بسبب أني قاعد نكتب حاليا في مقال بالانجليزية بش يخرج في كتاب حول موضوع العمارة المعاصرة في الدول العربية من قبل مركز مختص... و كانت لي فرصة بش قدمت أجزاء من المقال هذاية في محاضرة في مسقط راس والدي مدينة المكنين و تحديدا في مقهى العايلة (قهوة الكحلاوي) في السوق الدخلاني لعدد من طلبة الآثار من كلية القيروان و مكاكنية زادة و ذلك بطلب و اقتراح من أستاذي و صديقي رياض المرابط... و كنت جبدت في المحاضرة على مشروع سما دبي و قلت أني مازلت نستنى في أي معطيات عليه و أني ندعو أننا نقومو بنقاش حول الموضوع مش فقط في الأوساط الأكاديمية بل أيضا في الأوساط الإعلامية و هو الأمر إلي من المفروض يحصل في بلد متحضر و يحترم وجهو المعماري و الحضري.... على كل حال فاجئني الحقيقة اليوم الأخ المدون المهدوي صاحب مدونة "سقيفة" مشكورا بنشرو لماكيت و مجسم يقول أنها للمدينة الجديدة... و أنا نرى الحقيقة الوثائق هذية مهمة برشة.... و بش نخلي التعليق عليها لمقال بش نحضرو في المدة القريبة القادمة لنشرو في أحد الصحف التونسية على الأرجح لدفع النقاش حول الموضوع هذاية