الأحد، مارس 30، 2008

"حوار مع الشباب" في باردو... و الهوية "القرطاجنية" لتونس

زوز مواضيع من الصباح متاع اليوم...


أولا، تقرير (هنا) على جلسة حوار فيه عضوة في مجلس النواب مع تلامذة من معهد ثانوي في باردو في إطار "الحوار مع الشباب" إلي كنت تحدثت عليه في تدوينة سابقة (هنا).. بون الصحفية ماعطاتناش كيفاش تم تسيير الجلسة و كيفاش تم اختيار المشاركين في قاعة الدرس... و أحيانا تحس إلي ما فماش توازن في وجهات النظر و هذا ما يأدي للتساؤل عما إذا كان هذاكة ناتج على حقيقة الأراء في "الشارع الشبابي" و إلا بسبب العينة إلي شاركت... لكن يظهرلي إلي تم التعرض لإشكاليت حساسة نوعا ما في وسط تلمذي مهم... ربما كنت نفضل إلي السيدة النايبة ماتحضرش أصلا خاصة أنو حسب التقرير بعض التلامذة شافو في طريقة حضورها نوع من الأسلوب التلقيني و يتم الحوار مع ناس خبراء في المواضيع هذية و إلا حتى أساتذتهم... و هذاية في اتجاه أني نعتقد إلي الحوار في ذاتو مسألة ضرورية في الوقت الراهن و بالتالي من المهم أنو يتعمل على قواعد سليمة... بالمناسبة، بالرغم أنو بعض التعليقات على تدوينتي إلي فاتت ربما متشائمة من النقاش الجاري خاصة أني فهمت أنو بعض إلي حاولو يشاركو في المنتدى إلي تعمل خصيصا ما تنشرتش مساهماتهم حتى الآن.... لكن ريت بعض المساهمات الجريئة نوعا ما و مانراش علاش يتم نشر مساهمات دون أخرى

ثانيا، فمة مقال (هنا) كتبو مختص في علم الاجتماع حول الأصوات إلي تطلع بين وقت و آخر حول "الهوية القرطاجية" لتونس... بالرغم إلي المقال كان يكون أكثر دقة في حالة كتبو مختص في التاريخ (تحديدا اختصاص التاريخ الثقافي) إلا أني يظهرلي المقال معمول بشكل مهني و فيه مجموعة من المعطيات العلمية المهمة... نحب ننصح بعض الدوغمائيين أنهم يركزو شوية و يقراو المقال بش ما يوجعوناش روسنا بالأفكار المتوسطة خاصة كي تخرج الأفكار هذيية من عند ناس توفرتلها الفرصة بش تقرى و تتعلم في جامعات مرموقة... بالله أقراو شوية للمختصين و يزيو بلا لغة شعبوية و سياسوية في موضوع حساس كيف الهوية .. لغة متاع بروباغندا في موضوع الهوية في بالي رتحنا منها... 

3 التعليقات:

mandela يقول...

wallahi a propos 7iwar echabeb de kelle chabeb on parle echabeb illy 3andou papa wmama wvilla luxe walla 7ata apart fi nasr city wyashar fil biwa wki ti7 bih yemchi lil boeuf sur le twa les jeunes hedhom illy y7awrou fihom est ce ke andhom des problem berrasmi binetna je crwa pas
ti maw ki le7kouma walla 3andha soudain des couilles maw temchi lil 7wem echa3biya wta7ki m3a les jeunes ly t7eb ta7re9 welli tdili fil mo5adret wetzara9 fi soubya donc brabi yezziwna mitnoufi9 mta3 langue de bwa mta3 7koumet sab3a raw yonna marre ras lbol oufffff
pour lot sujet chwi daccord with you tare9 mais le problem hna est echa3b lkarim illy charboulou mo5ou ba3d bism illeh errahmen errahim wta3yita chbeba wkolha 7amessa mta3 allaho akbar wal islem howa l7all lil assaf echa3b hedha me9tana3 illy tari5 tounes lmochre9 bda m3a lghazw il islemy willy 9bal ifri9iyya kenet ghar9a 7atta l3ankouch fi ghayeheb idholoumet
big up brada tarek

HNANI يقول...

yoth'horli innikach fi mawdhou3 ilhawiya,bach ifarakna, wa7na illi inlawjou 3la ilwi7da mta3 tounis.. hadha ti3jbou kartage, wa hadha ti3jbou rouma, wa hadha ti3jbou ilbarbir.......
3ad ana inkoul kif ma kolt fi makal ktibtou 3andou chahrin et j'ai dis ana tounsiya la ghayir.

Werewolf يقول...

"لا نريد الاستماع إلى مشاغلكم..." توة هذي دخلة متاع حوار الأغلب على الظن أنو تفرض على التلامذة...الاجابات ما تنجم تكون مختلفة إلا ما تكون متأثرة بالتجربة الشخصية و مشاغل كل واحد فيهم...و بالصدفة يقع الحوار في باردو معناها أقرب نقطة لمجلس النواب... ما تنجمش تكلف روحها مشاق التنقل...

بالنسبة للهوية نرى إللي هي نسبية و يلزم ناخذوها في إطارها التاريخي... معناها كي ناخذوا السلم الزمني قد ما ترجع أكثر في الزمن قد ما ثقافات سابقة يزيدوا يقواوا و العكس صحيح. الحكاية ما هياش عام و إلا اثنين و إلا حتى عقود و إنما آلاف السنين اللي تتبنى فيهم الهوية...يظهرلي اللي الحل هو أننا نخزروا القدّام على خاطر الهوية تفرضت علينا ماللي تولدنا... لكن ما يمنعش أننا نثريوها كل قدير و قدره و كفانا انغلاقا و تشبثا بأسس اعتبرت كدخيلة هي أيضا في وقت ما.
ا