ضد الحجب و تهريب الفياغرا في كبوط... و الحديد

في إطار الالتزامات الجديدة ربما مش ممكن بش نكتب بشكل منتظم و يومي كيف ما نحب... أما ساعات بش نعول على تدوينات على الطاير... حبيت أولا نشير للوضع الجديد متاع "ضد الحجب"... برباش نظم لومور بما فيها الادريسة و بعض التقنيات إلي بش نحاولو نراوغو بيها "المدافع" العتيد "عمار"... و في جميع الاحوال إذا كان "ضد الحجب" مش محجوبة ما لا علاش موجودة... و بمناسبة الخبر حول رفع بعض الحواجز على الاعلام و الاعلاميين... آخي توة المدونات المحجوبة هذية مش حجبها يسبب وجع الراس أكثر من "خطرها"؟ نقول هذا طبعا و أنا في بالي "ضد الحجب" قاعدة تقوم بعمل متحضر من خلال الرغبة في الحوار مع عمار... و حتى انجمو نعتبروه عمل خيري من زاوية أنو الراجل ما يحكي معاه حد... و هز ساق تغرق لخرى... و يقع تحميلو مسؤوليات أكبر منو...

بشكل سريع قريت الخبر هذاية إلي ضربني على راسي قبيلة و أنا لاهي بلوحات عصمان حمدي... برشة أسئلة محورية يطرحها الخبر: باهي "الكونترا" على االحدود ما شية أمورها بشكل عادي منذ قرون و آلاف السنين... أما ما عمرها ما تعملت ليستة واضحة في الاشياء إلي تحتاج التهريب... يعني في الحالة هذية هل المسألة ناتجة على نقص في العرض في السوق الداخلية أو بفعل تزايد الطلب؟ و في النهاية علاش منع مادة متوفرة في معظم أنحاء العالم خاصة مع تواجد الطلب.... ثم يظهرلي 800 علبة حكاية فارغة... و بهامة بصراحة أنو يهربهم في الصيف في "كبوط"... شنية التجودير هذاية... أنا عندي فكرة على المهربين الهوايف على الحدود الجزائرية و الليبية و في بالي ما يحصلوش هكة... طبعا فمة العلفة ديما موجودة... في الحالة هذية زعمة كان ما ينجم يخلص كان "إسبيس"؟ من جهة أخرى أنا شخصيا مع "تشريع التهريب" بالرغم من تناقضات الفكرة هذية... يعني هذا ميدان يوفر موارد رزق و شغل... يلزمو شوية تنظيم... أولا علاش طبيب و صيدلي يهربو... يا أخي فمة ناس بطالة ما لقات ما تخدم و مش باهي بصراحة كيما يقعش إدماجها في سوق التهريب... يلزم تنظيم القطاع ما فمة حتى شك...

إي تذكرت حقة موضوع الحديد... فمة تدوينة قريتها قبيلة شوية (هنا) ذكرتني في موضوع قريت عليه في مصر توة مدة (هنا)... زعمة مش هذية طريقة حل أزمة الحديد و بقية المواد الصلبة... فعلا حلول إبداعية و مبتكرة...