ملاحظة لخونا حسين "موحد أمة المدونين" رحمة بالمؤمنين في هذا الشهر الفضيل

حبيت نلفت الانتباه لبعض المدونات الصديقة و لكن زادة ذات الطابع الأكاديمي و الثقافي و طبعا مع مسحة شخصية إلي ممكن ماهمش ظاهرين برشة في قائمة المدونات التونسية خاصة أنهم ماهمش على لائحة "تن-بلوقس" إلي مشرف عليها خونا حسين بن عمر ("موحد أمة المدونين" كيفما يطلق عليه المشاغب أبدا خونا البيغ تراب بوي). حبيت إذا نلفت الانتباه مثلا لمدونة ناقد فني و صحفي صديق مشرف على صفحة الفن التشكيلي في جريدة "الصحافة" و هي حسب رايي أهم صفحة مختصة في ميدان الفنون البصرية في الإعلام التونسي، مدونة عمر الغدامسي. كذلك حبيت نلفت الانتباه لمدونة جديدة تماما للصديقة و الزميلة سابقا في الدراسة و الآن جامعية و أستاذة في كلية الفنون الجميلة بسوسة شيراز مصباح إلي اقتنعت أخيرا إلي إحداث مدونة ماهياش علم اليدني (مرحبا يا شيراز في عالم التدوين)... و شيراز مختصة في العمارة الكولونيالية يعني الي تعملت في وقت الاحتلال الفرنسي و هو موضوع ماعندناش فيه مختصين برشة بالرغم من أهميتو الكبيرة... كذلك حبيت نلفت الانتباه لمدونة الصديق وليد بن عمران أصيل جربة دائما و أبدا و إلي يحضر في دكتوراة على الألسنية في باريس و إلي كذلك التحق مؤخرا بعالم التدوين.... أخيرا فمة مدونة صديقي المشاغب محمد مومني إلي أطلقها على إثر تعرضو للعزل مؤخرا من جملة عدد آخر من الأساتذة المعاونين صنف أ في التعليم الثانوي و هو محور أزمة راهنة بين نقابة التعليم الثانوي و وزارة التربية... على كل هذه أمثلة نعرفها أكيد فمة برشة أمثلة أخرين.... لكن يا خونا جسين بالله ما تحرمش المدونين و قائمة "تن-بلوقس" من هل المدونات و المدونين و ما تحرمش هذوما من تفاعل مدونين إضافيين معاهم
أية ذنبك على جنبك في هذا الشهر الفضيل
:)))