الخميس، جوان 19، 2008

تدوينة في اليوم ضد الحجب حتى 1 جويلية؟... ثم علاش ما يحلش مدونة... عمار؟

قدام تكرار "القصف العماري" يبدو أن الموضوع يستحق تفاعل غير كلاسيكي... أيام تتضمن فعاليات تدوينية مختلفة حتى 1 جويلية إلي اقترحو العام الماضي الصديق سمسوم و اقترحتو"ألجي" العام هذا كيوم لحرية التعبير... مثلا تدوينة في اليوم ضد الحجب (أي حاجة كلام، صورة، غنا...) من نهار السبت إلي جاي.. يظهرلي السكات و الفرجة بش يخليو الممارسة هذية تتكرر و تشمل الساكتين و المتكلمين.. في أقل الأحوال من حق "المحجوبين" معرفة أسباب حجبهم... "عمار" المصري مثلا يتميز بالشفافية... يا خويا علاش مايحلش مدونة "عمار" يدون فيها و يفسر طريقة العمل.... بالرغم أنو هذا ينجم يأدي لأنو "يحجب نفسو" بشكل أوتوماتيكي أما على الأقل شوية شفافية....

8 التعليقات:

Bechir يقول...

فكرة باهية يا طارق، وباهي زادة كيف ما حصرتهاش في نهار واحد.

بالنسبة ل"عمار غريب الأطوار" هذا، حسب رأيي هو اللي يلزم يقعد على الأريكة متاع فرويد (مادام تقعيد الناس قدام فرويد موضة اليوم على البلوغوسفير) باش نفهموا على الأقل شنية الإستراتيجية اللي قاعد يتبع فيها المقص متاعو.

أية مالا إلى يوم السبت...

titof يقول...

اي تعملوه مليح
واحنا معاكم

Tarek طارق يقول...

بشير... تعرف حكاية فريود هايلة هذية... طبعا تصلح للي يستحقها مش للي يجي... أنا يظهرلي "عمار" يستحقها... أنا نقترح أنو المدونين يحلو مدونة باسمو و يحطو رواحهم في بلاصتو... مدونة عمار 404... يكتب فيها (أو يكتبولو فيها) بكل حرية...

تيتوف... مناسبة للـ"وحدة الوطنية" البلوقوسفيرية... هذا موضوع يهمنا الناس الكل بمعزل عن اختلافاتنا الفكرية و الايديولوجية... و حتى حد ما ينجم يدعي أنو مواطن متميز وقتلي يتعلق الأمر بعمار 404

Bej يقول...

نقترح باش كل واحد يعمل نسخة من الرّسالة المتسبّة في الحجب في البلغ متاعو!! وهكّاك سي عمّار؛ أدام اللّه عزّه؛ يلزمو يقصّ البلوغات الكلّ، الأمر إلّي يصعب عليه شويّا!!

ابوناظم المرزوقي يقول...

فكرة باهية يا طارق انا معاك حتى لنهار السبت اللي من بعد السبت اللي بعدو سبت اخر
فكرة بشير هايلة كل ما تتقص مدونة العباد الكل تلتزم تهبط التدوينة اللي ضربها الجلم وهكاكة نكونو يد واحدة ضد عمار.

ابوناظم المرزوقي يقول...

عفوا نقصد فكرة bej

Bej يقول...

abunadem@
نورمال ياراجل! المهم أنّو الفكرة تطّبّق على أرض الواقع و تكوّن لُحمة بين الوخيّان المدوّنين في هلْ الفترة إلّي تحس التّشرذم هو إلّي بدأ يخيّم على البلغسفار

Werewolf يقول...

@طارق و بشير:
تفدلكوا بيها انتوما الحكاية، فرويد بيدو ماظاهرلي كان يفهمو و يفهم المنطق اللي يخدم بيه هذا كان اقتنع أنو يجلس على الفوتاي أصلا...نرجع ديما إل كلمة وليد بن عمران اللي هذا يتسمى "غباء صناعي "