الثلاثاء، سبتمبر 02، 2008

رفع الحجب عن فايسبوك؟ دروس في علاقة بسور عمار العظيم

فمة أكثر من مدونة (هنا و هنا و هنا و هنا) أشارت لاحتمال رفع الحجب عن "فايسبوك"... إذا كان رفع الحجب بش يستمر فإنو هذا يعني بالأساس عدد من الدروس.. أولها طبعا درس قديم قدم البشرية و هو "العرعور ساعات يجيب"... اتساع شبكة فايسبوك داخليا في تونس و خارجيا بالتأكيد ساهم في أنو العرعور كان كبير... الدرس الثاني أنو قرارات عمار ماهياش قرارات نهائية... كل شيئ يخضع للمراجعة.. لكن طبعا بشرط العرعور...

هذية ثغرة تفتحت في سور عمار العظيم.... على أمل إتساعها و فتح ثغرات أخرى...

بالمناسبة.. فمة تعليقات تنشرت على مقال لوتوم البارح (هنا و هنا)... و برغم أنهم ما نشروش كل التعليقات (بما فيهم تعليقي إلي كان كيف التعليقات المنشورة)... إلا أنو هذية مناسبة أخرى بش نحيي جريدة لوتوم...

11 التعليقات:

Werewolf يقول...

حتى أنا كنت باش نسئلك علاش ما نشروش التعليق متاعك! ميسالش انشرو هنا...
عمّار وقتلي يرفض الحوار فيها حكمة على خاطر وقتلّي تجيه الأوامر باش ينحي الحجب، ينحيه من غير ما يعمل زازة و ندوة صحفية معناها بَنقص تطييح قدر و تهنتيل مع مستعملي الأنترنات... أما كان يطلع اجتهد وحدو و حجب الفايسبوك من غير ما يشاور، يولي عمل غلطة عمرو و كلا البخص حتى يقول يزّي... يا عمّار أيّا ادّز فازتك و تنحي الحجب على كالكو سيت شماتة في عروفاتك

Bechir يقول...

@Tarek

بالنسبة للموقع متاع "لوطون" (و الصباح زادة)، أنا في بالي الجماعة إلي شادينهم تاعبين ياسر من الناحية التقنية. وقداش من مرة ينشروا تعاليق بعد اسابيع على ارسالها... نقص في الحرفية و تعامل مع النسخة الإلكترونية بنوع من اللامبالاة... ولا باللهي كيفاش جريدة كيما الشروق بالمحتوى متاعها الهزيل عندها موقع يوحي أنو باش يطلّع صاروخ وجريدة كيما الصّباح أو لوطون حتى خدمة "آر أس أس" مازالوا حايرين فيها.

@werewolf

هذاكة يتسمى حفظ ماء الوجه. ولو انو وجهو ما فيه ما يتشاف عمار (إذا كان يطلع يشبه للتصوير إلي حطيتهالو هاكة المرة)

البرباش يقول...

حاجة اخرى يلزم اخذها بعين الغعتبار زاده يا طارق، و كنت انتي زاده تحدثت عليها في وقت سابق... الحملة الدعائية متاع التونيزيانا ع الفايس بوك، ما نتصورش كان رماو فلوسهم و استخلفوا ربي فيهم و قعدوا ساكتين... ديمة ثمة علاش

Werewolf يقول...

@البرباش:
أنا شادد صحيح اللي تونيزيانا تسببت أكثر في الحجب... لكن استفادت منّو على خاطر المدة لخرة كثرت الحركة عالفايسبوك و الناس الكل تداولت اسم تونيزيانا و علاقتها بالمشكلة... زيد في تونس ما نتصورش ثمة قانون ينظم الإشهار على الأنترنات... ما كانش كل من تتحجب مدونتو يمشي يعمل عقد آدس معاها و يا ناس ما كان باس
:)))

Werewolf يقول...

باهي آش قولكم تطلع حكاية رفع الحجب عندها علاقة بزيارة كوندوليزا رايس لمنطقة المغرب العربي بداية من نهار 4 سبتمبر؟!
بالعربي مجرد ترتيحة

Werewolf يقول...

و كي تعملوا طلة على الرابط
هذا
لاحظ اللي النشر تم لربعة متاع الصباح معناها ملّي الجريدة خرجت مالمطبعة

Werewolf يقول...

أية هاو فرد مرة
الرابط
معناها النشر متاع مقال الخلصي قبل بنهار فيه إنّ و ما فيه حتى بطولة
على طريقة طارق الشنيتي اللي مازال يقلّي اللي الفايسبوك مجرد موقع و تحجب كيف المواقع الكل نتفاهم معاه
:)))

Tarek طارق يقول...

أنا بالنسبة لي هذا الكل دليل على حالة من الفوضى أو وضعية غامضة مش ممكن الحسم فيها...

حجب موقع فايسبوك كان لأسباب سياسية بالرغم إلي بعض التوانسة فقط يعملو في السياسة في الفايسبوك... و بالله ويروولف ما تدخلنيش في النقاش المتوسط متاع البعض المتوسط من نوع "تي عاد شبيه كي تسكر فايسبوك" و "رديتهولنا قضية" و "وينكم في القضايا لخرى" و مبعد تلقاه قننو خلواض في النهاية ما عندو حتى قضية...

كيف كيف كي وقع تسكير مواقع "مايعة" و "اجتماعية" سابقة (الدايلي مووشين و يو تيوب) البعض فقط كان يستعمل فيها سياسيا و رغم هذاكة تسكرت.. استثمار المواقع هذية لأسباب سياسية من قبل البعض كان سبب الحجب... و طبعا هذا ما يحملش المسؤولية للناس إلي تحب تعمل السياسة و لكنت للناس إلي تسخايل أنو الحجب بش يوقف الرؤى المعارضة أو أنو أي رؤية معارضة هي رؤية "تعكر صفو الأمن العام"...

أنو صار احتجاج واسع من مستعملي الانترنت (و كل واحد السبب الخاص بيه للاحتجاج بما في ذلك التفوريخ بالنسبة للبعض) فإنو هذا حاجة واضحة للعيان...

توة يقعد تحليل يعتمد التخمين و مش على معطيات... هل قرارات عمار التفصيلية (اليوم بش نسكرو فايسبوك.. البارح سكرنا الرابيد شاير) يقع نقاشها على أعلى مستوى قبل التنفيذ؟

في جميع الأحوال إعادة فتح فايسبوك نقطة إبجابية في ذاتها... و فرصة لتوسيع المطالبة بفتح بقية المواقع.. و التأكيد على أنو الحجب خاطئ أساسا

Werewolf يقول...

ما عندي ما نزيد... أما راني مانحبش ندخلك في حتى نقاش متوسط... كل ما في الأمر أني استعملت عبارة خاطيتني و ذكرت صاحبها من باب الكوبي رايط لا غير

Tarek طارق يقول...

ويروولف طبعا مش إنت المقصود... أما قداش يلزم فمة بهامة بش الواحد ما يفهمش أنو "قضاياه الرئيسية" مش ممكن يدافع عليها وقتلي فمة الحجب...

nasr يقول...

"هذية ثغرة تفتحت في سور عمار العظيم.... على أمل إتساعها و فتح ثغرات أخرى..."

زعمة تقول انتي النقبة تزيد تتحل؟ على كل حال الحكاية فيها برشة دهاء و حنكة و عدم استسهال المنافس، و فيها زادة برشة حشمة و فضايح و يا شماتة الدول الصديقة و الشقيقة فينا

الحكاية فيها و ما فيها