الأحد، سبتمبر 14، 2008

مقالي الأسبوعي في "العرب" القطرية... الأزمة الاقتصادية الأميركية و مفارقتها السياسية

الموضوع أصبح مهم للغاية خاصة خلال الأسبوع الفارط و هذاكة علاش اخترتو كموضوع عمودي الأسبوعي... لكن إلي استفزني فعلا هو نتائج استطلاعات الرأي إلي خرجت الجمعة هذية و إلي عكست الاهتمام متاع النسا البيض بـ"نجومية" سارة بالين أكثر من اهتمامها بالوضعية الاقتصادية إلي ساهم في تفاقمها و تأزيمها الادارة الحالية... المهم المزيد من التفاصيل هنا في المقال

3 التعليقات:

zabratfromgeneva يقول...

انا يضهرلي طارق اللي الازمة هذي اختلقها اطلال ادارة البوش اللي لاهين بالمالية كيما عمل ساركوزي فالانتخابات متاع عمناول.الجمهوريين يركزو برشة على ضحالة برنامج اوباما الاقتصادي و يتصورو اللي الازمة بش تتفاقم اذا اوباما يدخل للمكتب البيضوي.
اما اذا نجيو للازمة االازمة الاقتصادية من بعد تقني بحت فانو اولا و من غير دغمائية ناكد اللي امريكا و سويسرا هما الزوز بلدان بركة فالدنيا اللي يستحيل تجي فيهم ازمات اقتصادية(سويسرا ضاهرة علاش)اما فامريكا فما حاجة اسمها '' اكتوريال سيانس '' يعني فما عباد يعرفو وضعية العالم القتصادية بعد عشرين سنة.مثلا فما مخطط عملوه طلبة في يال يمكن الخمسة ادارات الجايين من مجابهة الغزو الصيني.
باهي,حكاية السوبرايمس كانت تنجم تتفاداها الشركات السكنية الكل اما الغلطة اللي عملوها هما اللي ماامنوش استثماراتهم مليح و كي كلاو كبوط عمناول شركات التامين غلات في بوليصة التامين 300% وهو ماخلى المستثمرين يوهغو بش يحطو فلوسهم.فريدي ماي بالزهر عملت عليها مشروع عمناول و لقيت اللي كانت تخلص في سويس ري 2مليارات دولار فالعام و توا حسب ماسمعت اللي البوليصة ولات في دورة 5 ولما وحلو بش يخلصو جاو جماعة من تايلندا و عاونوهم لكن بشروط جهنمية.
من رايي المتواضع اللي تدخل الدـاوـف (ادارة المالية) هو اللي بلبزها خاطر المدانين الكل حبو يعملو عالدولة و هو ماولد شبه تضخم مالي يعني انو الفلوس موجودة لكن الستثمار ما فماش.
اما انا نتصور من هنا لنوفمبر الازمة بش تتحل خاطر النفحة متاع الالعاب الولمبية طفات و رؤوس الاموال بدات تبوجي شوية.

Tarek طارق يقول...

زبراطمنجينيف... مسألة أنو فمة أزمة في الوقت الراهن و إلا مش خاضعة للنقاش... فمة تقريبا إجماع على الموضوع... حتى الاطراف السياسية إلي مش من مصلحتها الاقرار بالنقطة هذية ما عادش تنكر الوضعية الحالية بما في ذلك حملة ماكين...

النقاش هو حول طبيعة الازمة و أسبابها و حجمها...

الاطلاع المنتظم على وسائل الاعلام الأساسية في القلم هذا يعطي فكرة على النقاش الراهن: نيويورك تايمز، الواشنطن بوست، وول ستريت جورنال، إيكونوميست، فايننشيل تايمز...

أمريكا مرت بأزمات متفاوتة في خطورتها تاريخيا و ما عندهاش مناعة من حيث الازمات الاقتصادية...

تدخل وزارة المالية الاحد إلي فات هو إلي أنقذ فعليا الوضعية على الاقل مؤقتا...

بالعكس حسب استطلاعات الرأي و المراقبين الجمهوريين هاربين من نقاش الاقتصاد.. هذية مسألة بديهية و معروفة... كيف كيف من الضروري الرجوع للمصادر المختصة قبل التعليق في المواضيع هذية

Werewolf يقول...

اي هو كي تجي تشوف تلقى الجمهوريين هاربين من نقاش كل ما يهم الشارع الأمريكي موش كان الوضعية الاقتصادية أما التربوية و الصحية زادة... ما لقيتهم فالحين كان في حكاية الحرب و قتلي هوما المفروض يستعملوا برشة في الدين اللي نتصورو يتعارض مع الحرب... بخصوص سارة بايلن ثمة برشة قاعدين يستغلوا المدة هاذي في عبارة أوباما اللي الخنزير يبقى خنزير حتى كي تحطلو الحـُمّير في إشارة منّو ليها رغم اللي هو أنكر في اللايت شو متاع لاترمان و برشة نسا فكّرتهم الفازة بنبزياتو لهيلاري و خلاتهم يتقربوا أكثر من سارة