تسبقة للتدوينة البيضا

توة مازال ما جاش 25 ديسمبر هنا في شرقي الولايات المتحدة... نحب نقول كليمتين قبل ما ندون بالابيض... التدوينة البيضا هي حسب علمي من أقدم المبادرات في البلوقوسفير التونسي بشكل عام (باستثناء المدونات "المواطنية" أو إلي مختصة في الموضوع السياسي) إلي تعبر على رفض للحجب... يعني مدونين "عاديين" (بمعنى إلي السياسة ربما ما تمثلش خبزهم اليومي) قررو الاحتجاج على حجب مدونات تتحدث في السياسة... على كل بالنسبة للي يحب يعرف أكثر فمة حوار قصير من عمناول في مدونة رديون مع آدم يتحدث فيه على حيثيات المبادرة هذية (هنا)... هذية عادة حميدة و يلزم التمسك بيها طالما فمة حجب غير معقلن بالطريقة السايدة توة (حول الحجب و عقلنته شوف مقالي حول الموضوع هنا)... البلوقوسفير التونسي ماشي و يكبر و ماشي و ينضج... فمة أكثر من حادثة تأكد النسق التصاعدي هذاية و آخر مؤشر (و مش المؤشر الوحيد) هو ردة الفعل حول مسابقة المدونات.. و لهنا نحب نقول إلي كيف نقول "ماشي و ينضج" ما نقصدش أنو ماشي و يكثرو فيه الناس الملتزمة بخط سياسي محدد... هذيكة بالمناسبة أحد مؤشرات نضجو لأنو مانجموش نتخيلو مجتمع ناضج إذا كان مافيهش مشاركة سياسية و ما ينجمش يكون فيه مشاركة سياسية إذا كان يغيبو فيه الناس الملتزمة بخطوط سياسية معينة إلى جانب الناس إلي مش ملتزمة بخط سياسي محدد و إلي تتسمى عموما ناس "مستقلة" (بمعزل عن الالتباسات العديدة في المصطلح هذا) بالاضافة إلى الناس إلي مايهمهاش السياسة جملة و تفصيلا... "النضج" إلي نقصدو لهنا هو الوعي بأنو الاختلاف حاجة طبيعية... صحيح إلي نسق الوعي هذا بطيئ.. صحيح أنو يعرف كدمات.. صحيح إلي جاي في إطار "انحطاط" في الاسلوب و في الكم التدويني... لكنو موجود... و في الاطار هذا انجمو نحطو مبادرة "شبكة مدونين تونسيين من أجل تدوين حر"... طبعا جات في إطار مبادرات مختلفة لكنها في الأساس تتويج لتراكم امتد على ثلاث سنين.. و انا نعتقد إلي التدوينة البيضا لولة سنة 2006 ترمز لبداية التراكم هذاية... عنوان التراكم هذا هو ببساطة القطع مع مرحلة رفض التحدث في السياسة و تجنب التحدث في السياسة لظروف معينة مش وقتو التفصيل فيها... أنا نعتبر إلي "شبكة مدونين تونسيين من أجل تدوين حر" هو إطار بالرغم من عدم وجود هيكلية واضحة و تراتبية فيه و بالرغم من أنو ما يدعيش التحدث باسم المدونين الكل إلا أنو يعبر على رغبة متنامية في التوافق (بمعزل عن أي اختلافات كانت) من أجل التكاتف للدفاع عن حق حرية التدوين بوصفو جزء من حق حرية الكتابة و بالتالي التعبير...

كل عام و الدفاع عن حرية التدوين بخير