السبت، ديسمبر 20، 2008

اتهامات رشوة في شركة النقل بالكاف

برنامج "عن حسن نية" في قناة "حنبعل" نتبع فيه و قاعد نلاحظ إلي كل مرة يقدم خطوة إيجابية.. الحلقة لولة تم التعرض لشخص باني بشكل مخالف للتراتيب و رغم حكم المحكمة ضدو فإنو البلدية عاجزة عن التنفيذ "بسبب العلاقات متاعو" كيفما تقال أكثر من مرة في البرنامج (تنجمو تشاهدو الحلقة هنا).. الحلقة الرابعة و الأخيرة إلي تفرجت في جزء منها الموضوع هو ادعاء زوز عمال (شوفرة) أنهم اطردو من الشركة الجهوية للنقال بالكاف بشكل تعسفي لأنهم وقفو ضد الرشوة إلي يتعاطى فيها بشكل مشترك "كاتب عام النقابة" و "الرئيس المدير العام" (تنجمو تشاهدو الحلقة هنا)... برغم بعض الملاحظات حول الديكور و اضطراب المقدمة في بعض الأحيان أو بطئها بشكل أصح و خفة بعض المحامين إلي مشاركين (خاصة واحد اسمو بن صالحة) و طبعا فمة الكثير من القضايا إلي ربما تظهر لبرشة ناس أخطر و أهم إلا أنو برنامج يستحق المشاهدة و التشجيع... تصورو كان مثلا اتهامات الرشوة و المحسوبية في شركة الفسفاط بقفصة إذا كان تم التعامل معاها بشكل شفاف من لول و إذا كان غطاها الإعلام هل كانت لومور بش تتطور بالشكل إلي اطورت بيه مبعد؟

5 التعليقات:

MeTaLLisTiC يقول...

خلاف الموضوع متاع الحلقة هاذيكة , البرنامج بصفة عامة باهي و أحسن حاجة فيه اللي هو ماهوش مسروق ( على حد علمي) و هاذي حاجة نتوقعوها من إعلامية متمرّسة كإيمان بحرون

3amrouch يقول...

@metallistic
regarde "Sans aucun doute" de Julien Courbet

3onsor يقول...

أنا اللي عجبني ، أني من غدوة قريت في الجرائد إلّي الرئيس المدير العام متاع الشركة و قع تعويضو (البرنامج مسجل طبعا) هذي هي الشفافية هههههه

Werewolf يقول...

طبعا ما خيرش مالحوار و الشفافية في
التعامل مع المشاكل أما مابعدنا عليهم.

@عمروش:
البرنامج مسروق مرتين لأنو سامي الفهري شرى الحقوق باش يعمل البرنامج في تونس 7 و حنبعل سبقوه و عدّاووه قبلو بالضبط كيما برنامج المسامح كريم اللي مسروق هو زادة.
الله غالب مانجموش نعيشو من غير قرصنة في تونس
:)))

3amrouch يقول...

وورولف
تي فينك ياراجل؟
تعرف حسب راي البرنامج معندو وين يوصل
موش باش يدوم برشة
وذلك
اولا الصحفية ايمان ردود فعلها عنيفة جدا ومتعرفش تدير الحوار ومقاطعاتها للمتدخلين عنيفة وموش حلوة لدرجة انو انا كمتفرج وترتلي اعصابي كمثال حلقة البو الي تحيلو عليه اولاد شوفها كيفاش تسكت في المراة(الاخت)
مقطعاتها المتكررة لمدخلات المحامين كل مرة باش تعدي مكالمة هاتفية
ممكن كان نجح البرنامج ينجح لسبب وحيد اننا شعب نحبو لفضايح وكيف نشوفو مصائب الناس نحسو رواحنا عايش هذاكه علاش ينجح موش للاضافة
حاجة اخيرة الصحفية متاعها تحت اي حق تصور كاميرا خفية وتدز البيبان وتدخل وتبد تلوج على هفوة للمعنى بالامر باش ينقضو عليه المحامين؟
تهريج نسميه
شوف زادة الحلقة الاولى وكيفاش مرتبكة قدام الكاميرا وتحسها ماهيش تلقائية حتى طرف ومصطنعة
نزيد ولا يزي ههههه