المفاوضات تتعطل

عندي مدة توة ما نيش نتبع في الكورة في تونس... بون العام هذاية تبعت شوية على خاطر نسخايب الكلوب بش تعمل حاجة (إي نعم بالرغم من كل النكسات و النكبات مازلت شادد الصحيح... و الإفريقي يا دولة!!).... زيد حتى المنتخب الوطني أمورو تاعبة يعني في المستوى متاع اللعب بالرغم إلي قاعد يربح في ماتشوات.... على كل حال بالرغم من هذاكة عندي فكرة قريبة شوية على "سوق اللاعبين" بسبب قرابتي و إلا صداقتي مع ناس عندها علاقة بالميدان... و الفكرة إلي عندي أنو باستثناء بعض الفرق (خاصة ليسبيرانس و ليتوال) فإنو بقية الفرق أمورها المادية مضعضعة و مضعضعة برشة زادة.... لكن الواحد كي يتبع عناوين الصحف في ما يخص الرياضة يظهرلو كاينو الحديث صاير على "سوق اللاعبين" متاع البريميير ليق متاع إنقلتيرا و إلا لا ليقا في إسبانيا.... بالله شوفو العنوان هذاية مثلا في الصباح متاع اليوم كانو السيد يحكي على الإشتباكات المسلحة في النهر البارد

أنا بالرغم مغروم بالكورة (يعني ما نقصدش الكورة في تونس) إلا أني نتعب برشة بش نفهم كيفاش يطلعو الصحفيين متاع الكورة بعناوين كيفما هكة... يقوى عليهم ربي قداهمش طيارات جماعة "سوق الصحافة" هذومة