درويش بين تسييس نعيه و التكفير... لا يهدأ حتى بعد وفاته

طبعا الساحة الفلسطينية تغلي... صراع "الإخوة الأعداء" ولى ينجم يمس كل شي بما في ذلك تسييس مناسبة نعي درويش... المشكل كيف بعض التوانسة يحصلو في وسط دعاية هالصراع العبثي هذاية... المشكل يولي أكبر وقت إلي يقع في وسط العبثية هذية صحفي من المفروض يتحرى من مصادرو قبل ما ينشر حتى شي. و على الأقل يذكر وجهات النظر المختلفة بش ما يحصلش في التعبير عن وجهة نظر دون أخرى... و يولي وقتها منحاز في صراع ما يمكنش فيه الانحياز لحتى حد.. مدونة "صحفي تونسي" نشرت التدوينة هذية بدون تعليق المتحري و الراغب في التثبت من مصادرو... شي بودورو من النوع إلي ما يفاجئناش برشة كيف نقارنوه بمنهج بعض الصحفيين في كتاباتهم الصحفية مش فقط في المدونات (هذا إذا كان فمة كتابات صحفية خاصة بالنسبة لـ"لصحفي التونسي" هذاية إلي شخصيا لتوة لا قريتلو مقال صحفي واحد)...

الرابط إلي تم نقلو هو من موقع مقرب لحركة فتح يعني عادي كي بش نلقاو فيه امتداد لصراع الإخوة الاعداء العبثي... كل المقال متاع "نابلس تي في" مبني على تصويرة (يعني مش حتى رابط) من منتدى قريب من حماس... و حتى نقلهم للعنوان متاع التصويرة مش دقيق... كيف جيت نقرى في التعليقات لقيت واحد من المعلقين مشا للموقع متاع المنتدى و حب يتحرى من الموضوع و وضع مجموعة من الروابط... أولا قال إلي ما شافش العنوان هذاية "هنا نقدم التهاني..." و أنا نتصور نحاوه المشرفين على المنتدى هذاية.... و زيد حط روابط (هنا و هنا و هنا) من المنتدى متاع حماس توري بالعكس ترحم عليه برغم أنو درويش كان في بعض الأحيان منتقد للسياسة متاع حماس في قطاع غزة... و ربما أنا نزيد أني مش فقط ما لقيتش الصفحة إلي أشارلها منتدى "نابلس تي في " (على الأرجح نحاوها المشرفين متاع المنتدى) لكن زادة تعملت ضفحة خاصة لنعي درويش و تاريخ فتحها سابق على الصفحة لخرى (10 أوت نصف الليل)... صفحة نعي درويش

المشكل طبعا إلي منتديات من النوع هذا منتديات مفتوحة و فيها برشة ناس مجهولة و مش بالضرورة أعضاء في حركة سياسية وحدة... و مش ممكن تعبر على موقف رسمي متاع حركات سياسية... بالمناسبة هذا رابط لنعي حماس لدوريش و روابط أخرى من أحد مواقعها الرسمية تأكد نفس الموقف الرسمي متاع الاحتفاء بدرويش (هنا و هنا)... و هذا في المقابل موضوع في المنتدى إلي قريب من حماس يعبر فيه البعض عن رفضهم للنعي و ردو عليهم أعضاء أخرين في المنتدى..

أي واحد ينجم يعمل في المنتديات هذية حساب و يدخل يلبز كيفما يحب كيف مثلا واحد في نفس المنتدى هذاية نفى أنو حماس قامت بنعي درويش و تبين أنو يكذب (هنا).... و مش من النزاهة اتهام حركة سياسية كاملة بموقف متاع واحد عضو في منتدى قريب من الحركة هذية خاصة أنو المشرفين على المنتدى هذاية ألغاو بعض المواضيع إلي كفرت درويش..

و النوعية الجهلوت متاع التكفير هذية تستمد معطياتها من منتديات سلفية وهابية مختصة في عمليات التكفير بالجملة كيف النوعية هذية مثلا... ناس من النوع هذاكة إلي كانو ديما يعتبرو درويش مجرد "كافر"... و الصراع خذا منحى إعلامي بارز مع غناء مارسيل لقصيدة "يوسف"... طبعا فمة بعض الناس قريبة من و داخل حماس أقرب للفكر السلفي الوهابي (كيف ربما بعض الأعضاء إلي خلاو تعليقات تكفيرية في المنتدى متاع حماس) و النوعية هذية مستعدة تذبح خصومها السياسيين على أسس إيديولجية تكفيرية مش مهم المصلحة الوطنية الفلسطينية.. و هذومة موجود التوأم متاعهم حول و داخل حركة فتح من النوع إلي يحب يضحي بكل شي من أجل ذبح غريمو السياسي بمعزل عن حسابات الربح و الخسارة في المشهد الوطني الفلسطيني...

في خضم ردود الفعل إلي الغالبية العظمى متاعها تترحم على درويش... فمة قلة قامت بالتسييس: جماعة "التكفير" و جماعة كيف "نابلس تفي"... و زيد البعض إلي يحصل في وسط هالخندق إلي بيناتهم...

البعض كيف "صحفي تونسي" هذاية يحبو على العناوين المثيرة متاع جريدة "الحدث" و العناوين الصحفية البودورو... و مش مهم في المقابل التحري و عدم الوقوع في فخ تسييس وفاة درويش... و هومة ما يختلفوش برشة على جماعة التكفير إلي عناوينهم ما تقلش إثارة... و درويش في الوسط... يصارع حقه في التفرد حتى بعد مماته...

درويش لاهو متاع حماس و لاهو متاع فتح... هو مشكل من مشاكلو أنو كان مصر على استقلاليتو السياسية... و هذا إلي خلاه يتذمر بشكل تهكمي لعبد الباري عطوان بأنو ما عندوش نفوذ...