الثلاثاء، أوت 19، 2008

مشتركين...

حسب إحصائيات وزارة الاتصال إلي تنشرت اليوم (هنا): أكثر من 8 ملاين مشترك في التلفونات بورتابل... نظريا 80 مشترك لكل ميات ساكن... الرقم لاخر: 2 ملاين مشترك في الانترنت... معناها حوالي خمس عدد السكان... و إلا (نظريا) اشتراك متاع انترنت لكل خمسة سكان... و هذاية رقم كبير.. بلوغة أخرى: تقريب اشتراك لكل عايلة إذا كان معدل العايلة التونسية أربعة أفراد... و هذية في ذاتها نقطة إيجابية...

هذا إشتراك الفلوس لكن شنية أحوال "اشتراك" القيم و السلوك.. هل فمة "عقد" حقيقي بين الطرفين... شركات الاتصال و المشتركين... هل الاشتراك هذا يمنح المشتركين مطالبة الشركات مثلا بأنها توفر حركة مرورية في الانترنت بدون حواجز و حفر... إذا كان واحد قاصد ربي لفايسبوك هل من حق المشترك يطالب الشركة بحق العبور... أي إنسداد في المرور ولى حمال أوجه... الناس (أو المشتركين) مش عارفين بالضبط هل "القصان" إعتباطي أم قصدي أم تجريبي أم "ترعيشة"(هنا و هنا) و إلا "ترهويشة" متاع ناس مش مثبتة شنوة بش تعمل...

فمة البعض يتذمر من الاشاعة لكن في الحالة هذية مثلا: كان فمة توقع للقصان و الحفر (هنا)... و ما فماش نار من غير دخان... هذاية مانجموش نصنفوه ضمن السلوك المرضي إلي يترعب من كل شي و يهول لومور... لأنو ببساطة فمة حالات قصان لمواقع متوفرة في معظم أنحاء العالم و القائمة طويلة (هنا)...

اليوم تعملت مجموعة في فايسبوك... عنوانها بما معناه ما نخلصش إذا كان تنحيلي الفايسبوك (هنا)... هذية مساءلة لمفهوم "الاشتراك"... لأنو مش من المفروض يكون اشتراك في اتجاه واحد... خلص و ما تسئلش...

4 التعليقات:

Bechir يقول...

Salut Tarek

Je veux juste rapporter cette info à propos de FaceBook et qui peut avoir un lien avec sa restoration:

http://www.webmanagercenter.com/management/article.php?id=45940

Car après tout, il n'est pas dans l'interet de Tunisiana qu'on lui coupe un champ commercial qu'elle vient tout juste de conquérir

À méditer

Tarek طارق يقول...

إي بشير مسألة تستحق التأمل بالرغم من الغموض القائم

هاني علقت لهنا
http://anticensuretunisie.blogspot.com/2008/08/blog-post_2247.html

Werewolf يقول...

ما تنساش يا طارق طرف ثالث و مهم و اللي هو اتصالات تونس بحكم علاقتها المباشرة مع عمّار... ما يخفاش اللي تونيزيانا سبقتها في استغلال الفايسبوك و إذا الحجب متاعو كان مبرمج فعلا فخير البر عاجله لوضع العصا في العجلة...حكاية مكتب العلاقات مع المواطن ما عادش تعاودها... عمّار موش متفاضي للدلال هذا و هو مقتنع اللي إذا كان طاح القدر توفى العيشة... الشي الوحيد اللي متأكد منّو أنو ما خذاش بنصيحتك و ما مشاش يبحّر

Werewolf يقول...

بخصوص مفهوم الاشتراك اصطلاحا في تونس، الخلاص مع مزود خدمة الأنترنات يتم مسبقا أي قبل بداية كل تريميستا و بالتالي تنجم تلقى روحك في وضعية أنك مخلّص و ما ثماش كونكسيون أصلا و ما عندك وين توصل أقصى حاجة تعملها أنك تبدل الفورنيسور... لكن حسب العقد اللي الحريف عاملو، لاتصالات تونس الحق في قطع الخط إذا كان الفورنيسور يشكي بيك و يقول اللي ما خلصنيش في مدة معينة... النقطة هاذي هي اللي تفددني و نرى فيها برشة عوج لأنو عادة المشاكل يكون المزود متسبب فيها و كل طرف فاتورتو وحدها فعلاش التيليكوم تحمي في المزودين و علاش المشترك ديما مغلوب على أمرو... يظهرلي موش كلمة الاشتراك وحدها اللي مفهومها غامض في تونس