الأربعاء، أوت 06، 2008

تطبيسة

عبد العزيز بن عاشور مؤرخ محترم و سليل عايلة بلدية محترمة اشتهرت بعلماء دين من أفضل ما أنجبتهم تونس من حيث العمق و الاعتدال و التجديد... هو أيضا وزير الثقافة الحالي... لفتت إنتباهي التطبيسة متاعو غير الضرورية... على الأقل على حد علمي "غير ضرورية"... شوف آخر الشريط هذا



بالنسبة للإطار متاع التطبيسة يعني زيارة القذافي هذاكة موضوع آخر ما نعرفش وين نبدى و وين نوفة... خلي نكتفي توة بما يقابل التطبيسة يعني بوسان الكتف متاع القذافي من قبل المسؤولين الليبيين... شوف نسخة كاملة من الفيديو هنا

6 التعليقات:

Samih يقول...

ان شاء الله ما توليش سنة حميدة، ماهي السنن الحميدة الكلها تبدا بمبادرات فردية

islam_ayeh يقول...

أعطي للذل كارووووووو...
ربي يهدي و أكهو !

WALLADA يقول...

ما نتصوِّرش التطبيسة بدافع القفـَّة يا طارق ، أنا نعرف العزيز بن عاشور شخصيـًّا راجل متربِّي برشة صدَّقني دايُورْ مانيش عارفة آش يعمل بالسياسة، و هاذاك أسلوبه في السّلام

FREE-RACE يقول...

خسارة..
تطبيسة مش في محلها... و غير مبررة بالمرة يا ولادة

Tarek طارق يقول...

ولادة نعرف عبد العزيز عاشور من خلال كتاباتو و من خلال إدارتو لمعهد التراث... و سمعت عليه كلام باهي كيفما سمعت عليه كلام هكاكة و برة... و في جميع الأحوال من المفروض يعرف و هو رجل ثقافة إلي الأداء الجسمي البشري عندو دلائل و معاني مقصودة أو غير مقصودة من خلال الأعراف و التعريفات الاجتماعية... و يظهرلي ما فمة حتى وزير سلم بالطريقة هذيكة... و زيد في أجواء متاع تطبيل دلالات حركات كيف هكة تولي أقوى... أنا يظهرلي في أحسن الحالات و إذا كان خذيناه على حسن نية فإنو نقولو ما ردش بالو...

WALLADA يقول...

نعرف يا طارق إلـِّي ما كاروش و زيد في الظرفيَّة هذه بالذات أي حركة تتفهم بالغالط أما ساعات البَلدِيَّة عندنا تصرُّفات تكسِّر الكرايم
نحكيلك حاجة؟ عندي خـُويَا الكبير يبدا في كرهبتو و يقصْ عليه واحد في 404 باشي و يزيد يقولو " حلّ عينيك مليتـُو علينا البلاد شدُّو الدشر متاعكم " آش يجاوبو خويا؟ " سامحني"
أما في بكل المقاييس ما كاروش يطبّس إلا لربِّي